[الشافعى الصغير]

 

Exclusive

كتب هيثم دبور
زى ما واضح فى اسمى
عمرك إنت شفت «هيثم» كان مناضل
حتى اسم أبويا «حامد»
يعنى مفناش حد ثورى
ياما قاللى.. لو فى يوم صادفك مظاهرة
سيبها واجرى
وارضى لو مش لاقى فرصة
اللى بيصرّخ بـ «لأه»
آخرته لا جنون... لا جُرْسَه
وافتكر إنى فنيت لك كل عمرى
لجل ما أشوفك كويس
زى ما باين عليَّا..
شاب مصرى..
عادى جداً
تخنقه الحكومات فيلعن
جوّه تدوينه فى عالم افتراضى
أو تسميّها مقايضة..
قايمة بينّا ع التراضى
نص جيجا فى الفضا أملاها شِعْرى
والمقابل إنهم أخدوا الشوارع..
عرض حصرى