[حملات دعوية]

وصل محمد لبيت ممدوح وضرب الجرس وطلعله الأخ ممدوح

ممدوح : مش عاوزين النهاردة

محمد : مش بكيفك ودخلني آكل أحسن ما آكل ودانك

ممدوح : (ضحك بصوت عالي ) شفت يا عم اللي جرا بقينا بناكل ودان

محمد : طيب ما نفرش عالباب ونقعد أحسن .. افتح ياد وأكلنييييييييييييييييييييي

ممدوح : طيب طيب يا ستار عليك

دخل ممدوح وصاحبنا محمد وأكلوا وتمام

محمد : أدام الله عزكم وغفر ذنبكم

ممدوح : وإياكم يا حبيبي

محمد : ها بقى هنعمل ايه في موضوع التوزيع ده؟؟ والله يابني أنا من يوم ما عرفت القصة وأنا مش عارف أنام

ممدوح : بتقول فيها ؟ ما أنا برضه كدة
بس ربنا ييسرلنا ويكرمنا

محمد : آمين

ممدوح : طيب احنا دلوقت هنشيلهم في كراتين ولا أكياس ؟؟

محمد : سؤال لولبي .. ما أي حاجة هتقضي ياعم

ممدوح : ط .. ياللا بينا؟

محمد : ياللا الله المستعان

خرج ممدوح ومحمد وهما شايلين أكياس فيها 700 حتة (ومش هاقولكم حتة ايه ^_^)

وصلوا للعنوان اللي رايحينه وضربوا الجرس

خرجت ست وقالتلهم : نعم .. خير

محمد : السلام عليكم (وهو واقف بجنب وباصص في الأرض)

الست : وعليكم السلام

محمد : مش ده بيت المرحوم /ــــــــ

الست : اه يابني

محمد : طيب الحجات دي ليكم .. ربنا يفك كربكم ويعينكم يارب

الست : ربنا يعزك ويجازيك خير انت واللي زيك ويكفيكم شر طريقكم

محمد : اللهم آمين .. مش محتاجة حاجة تانية يا أمي؟؟

الست : اشوفكم سعداء يابني ومجبورين الخاطر

محمد : آمين .. سلام عليكم

الست : وعليكم السلام

ونزلوا البطلين وهما مش محددين اتجاه يروحوه ووقفوا قدام العمارة عالشارع

محمد : ها يابني هنروح فين؟؟

ممدوح : تعالى نروح نشوف حد من العيال كدة ونقعد معاهم شوية .. من زمان مشفتهمش

محمد : طيب ياللا

ركبوا محمد وممدوح تاكسي وراحوا لشقة واحد صاحبهم

ممدوح : السلام عليكم

طارق : وعليكم السلااااااااااااااام .. عم دوحا فينك يابني؟؟

ممدوح : طاب دخلني الأول دا انت رخم قوي

طارق : وكمااااااااااااان محمد عندنا .. يا عيال كدة كتير وربنا

محمد : متاخدش على كدة بقى .. احنا جايين ناخد الفلوس اللي عليك بس ^_^

طارق : من أولها؟؟ ياللا ياد من هنا منك ليه

ممدوح : امال فين هيما وجمال؟؟

طارق : جايين بعد شوية ان شاء الله

محمد : وانت اخبارك ايه ياعم طارق؟
ولا رنة حتى ولا ميسد ههههههههه

طارق : رنة وميسد؟؟ ايه اللغة دي؟
أصلي مش معايا رصيد أمسّد عليك .. بس والله في بالي

ممدوح : يا اخوانا يا ظراااااااااف بطلوا استظراف وقوم ياد اعمل شاي عشان مش هنتأخر .. ورايا شغل بدري

محمد : اه والله انا كمان .. الشركة عملالي قلق وقربت اسيبها

ممدوح : ليه؟ لسة موضوع اللحية برضه؟

محمد : لا ياعم ما خلاص راحت عليهم
من ساعة الثورة وهما قللوا ساعات الشغل جدا مع انننا المفروض نشتغل أكتر عشان نعمل حاجة للبلد اللي خربت

طارق : اه والله عندك حق .. الناس بتفكر دلوقت انهم يريحوا الشباب ليرجعوا التحرير ^_^

ممدوح : هيهيهيهيهيه يا لذيذ يا رايق انت

طارق : الشاي يا معلمين

خلصوا الشباب الشاي وسلموا على بعض ونزلوا

محمد : ممدوح هو ايه اللي بيحصل ده؟؟

ممدوح : في؟؟

محمد : الودان ومية النار والأضرحة

ممدوح : دي زوبعة فنجان .. الناس بس مستكترين علينا اننا اخدنا افراج من حبس الظلمة لينا سنين ولما ظهرنا قالوا الحكايات المتألفة دي ولستر الله علينا الظروف هي اللي بتدافع عننا .. خدها بروح رياضية يا معلم

محمد : عندك حق.. أنا هروّح بقى .. مش عاوز حاجة؟

ممدوح : جزاكم الله خيرا .. سلام عليكم

محمد : وعليكم السلام

طلع محمد أوضته وفتح الكمبيوتر وفتح الفيس بوك ولقى المفاجأة ...

تابعونا الحلقة الجاية ان شاء الله