04-26-2011, 09:58 AM
|
|
|
{{ الحلقة الثالثة }}
محمد وصل للعمارة ونده للبواب (عم ابراهيم) اللي كان أكثر حد بيحب يقعد معاه ويتكلم وبيبص محمد لقى عم إبراهيم جاي ومن غير
دقنه
...
محمد : ايه ده؟ عم ابراهيييييم .. ايه ده؟
عم ابراهيم : بص يا محمد ماهو لما توصل للودان يبقى لازم نضحي
محمد : يا ربنــــــــــــــــــــا .. النهاردة يوم الودان ولا إيه؟؟
عم ابراهيم : وطي صوتك أحسن الناس تسمعك .. إلا قولي (وهو موطي صوته) هو لتر مية النار بقى بكام اليومين دول؟؟
محمد : (متغاظ) عم ابراهييييييم .. هو مش انت كنت زيي كدة ولحيتك كانت منورة وشك وجلبابك النظيف ومع بعض على طول في الجامع وكتب وشرايط و..
عم ابراهيم : لا لا لا (وهو بيتلفت حواليه) أنا تبت والحمد لله
محمد : (فاتح بقه مترين رأسي) متخلنيش أصوّت في وشك يا عم انت .. انا عاوز أفهم في ايه؟؟
عم ابراهيم : أنا احكيلك اللي سمعناه النهاردة في الجرايد ..
محمد : سمعناه في الجرايد؟؟ كمل كمل
عم ابراهيم : اه .. قالوا انه السلفيين قطعوا ودن واحد في قنا وكمان بيجهزوا لحملة هيهجموا فيها على كل البنات المتبرجات
في الشوارع بمية النار وكمان ياعم كسروا الأضرحة في قليوب
والناس بتقول انهم شوية شوية هيخلوا الناس مينزلوش من البيوت بعد الساعة 5 و ..
محمد: بس بس بس مين دول اللي هيعملوا كدة؟؟
عم ابراهيم : السلفيين
محمد : يا الله .. ( وسابه ومشي وهو شايط )
دخل محمد البيت لقى والدته قاعدة بتتفرج على التلفيزيون ولما شافته قبضت عليه
الوالدة: محمد .. تعالى هنا
محمد : (الابتسامة منورة وشه) حاضر يا ست الكل (واخد ايدها وباسها)
الوالدة: انت لازم تحلق دقنك وتسيبك من الناس اللي بتتكلم معاهم في الجامع دول وبتخرج معاهم
محمد : ليه ليه ليه بس كدة يا ست الحبايب مش انتي دايما بتقولي أنا مخلفتش غير محمد وعجبك قوي التزامي ده ؟ ولا كنتي بتقولي كدة بس عشان أنزلك الزبالة؟(وبيضحك وبيزغزغ الست الوالدة)
الوالدة: بس ياد أنا باتكلم جد .. دول شوية شوية هيقولوا انكم سبب في زلزال يوم الجمعة
محمد : (بيضحك) ومييييييييين جالّك يا امااااااي اننا ملناش ذنب؟ (بيتكلم بلهجة ساخرة وبيضحك)
والدته : برضه بتهزر ؟ ماشي يا محمد لما نشوف آخرتها ..
محمد : آخرتها باذن الله فل يا ست الكل
وقام محمد ودخل أوضته وغيّر هدومه واترمى على السرير
ودخل أخوه الصغيّر وجاي جري يرخم عليه
كريم : حموووووووووووو (وقام ناطط على السرير وقرّب يكسره)
محمد : حبيبي .. ازيك يا كوكو
كريم : كويس .. دا أنا صحابي في المدرسة بيقولوا يابختي علشان عندي أخ زيك؟؟
محمد : ازاي؟؟
تابعونا الحلقة الجاية ان شاء الله
|