عبدالرحمن:انا لما رجعت البيت لقيت بابا بيقولي اهلا اهلا......... وسيادتك ماشاء الله بقيت بتصلي ايه ده كله طبعا مش معقول تكون الست سها اللي قالتلك التزم بالصلاه
قولتله بابا انا عايز عمي يبعتلي دعوة عشان اسافر السعوديه
والد عبدالرحمن: ماشاء الله وانت والست سها طالعين تعملوا عمره سوا عشنا وشوفنا..... ده بقى اللي كانت بتتصل بيك عشانه
عبدالرحمن:لا انا هطلع لوحدي
والد عبدالرحمن:اه وهي هتقابلك هناك يعني
عبدالرحمن:لا انا هسافر لوحدي ومش هقابلها هناك انا هعمل عمره لوحدي صدقني
والد عبدالرحمن:اصدقك ........ده علي اساس ان كلامك ثقه يعني
عبدالرحمن:يابابا صدقني المره دي انا بجد عايز اتغيير صدقني
والد عبدالرحمن: مش عارف ليه انا حاسس انك فعلا متغيير مالك ....سها زعلتك في حاجه؟
عبدالرحمن:لا انا عايز اسافر اعمل عمره
والد عبدالرحمن :خلاص انا هكلم عمك يبعتلك دعوة عشان تسافر في اقرب وقت واخلص منك بقى
عبدالرحمن:تخلص مني يابابا .......طيب انا هدخل اوضتي حضرتك مش عايز حاجه
والد عبدالرحمن:لا سلامتك انا هعوز منك ايه يعني
عبدالرحمن:انا دخلت اوضتي ومش عارف ليه المره دي كلام ابويا مش مأثر معايا انا كل همي كان في كلام الحاج حسين انا كنت فرحان اوي وانا معاه حسيت بجد انه ابويا وزادت فرحتي لما عرفت ان المغرب قرب يأذن وهروح اشوفه تاني
محمد:ها وبعدين
عبدالرحمن:انا لما روحت الجامع لقيته بيقولي ازيك ياحبيبي عامل ايه وحشتني وانا طبعا مستغرب وحشتك ايه انا كنت لسه معاك لحقت اوحشك
الحاج حسين:ها عملت ايه في السفر
عبدالرحمن:انا خلاص ان شاء الله هخلي عمي يبعتلي دعوه وان شاء الله اسافر في اقرب فرصه
الحاج حسين:انا واثق انك هتبقي كويس وهتقعد في يوم من الايام مكاني هنا
عبدالرحمن:لا بلاش الخيال الواسع اوي ده انا ممكن اتغيير اه بس ابقى مكانك واسعه اوي دي
محمد:ليه يابني واسعه ماانت دخلت طِب اهو
عبدالرحمن:اشد في شعري ارحمني
محمد:لا شد في لحيتك
عبدالرحمن:......... المهم بعد صلاه المغرب لقيت الحاج حسين بيقولي خليك معايا هنا لحد العشاء
عايز اقولك كلام مهم
انت عارف الوقت اللي بين المغرب والعشا قصير جدا وناس كتير بتغفل عنه فانا عايزك تقضيه في طاعه ربنا وفي كلام مهم عايز اكلمك فيه بس ركز معايا
الحاج حسين:عارف ياعبد الرحمن انت ليه لازم تتوب من المعاصي اللي قولتلك عليها
عبدالرحمن:ليه
الحاج حسين:عشان رجوعك للطريق المستقيم وتوبتك طاعه لربنا وربنا بيأمر بكده
اسمع معايا الآيه دي كده اسمع ماذا يقول الله عز وجل
وَتُوبُوا إِلَى اللَّهِ جَمِيعاً أَيُّهَا الْمُؤْمِنُونَ لَعَلَّكُمْ تُفْلِحُونَ (31)
الحاج حسين:فهمت انا قصدي ايه
عبدالرحمن:بصراحه لا
الحاج حسين :بص يابني الآيه دي مدنيه يعني ربنا بيخاطب فيها اهل الايمان .... يعني الله عز وجل لم يقل في الآيه وتوبوا الي الله ايها العاصون او المذنبون وربنا قال كمان ان الفلاح هيجي بالتوبه رزقني الله واياك الفلاح في الدنيا والاخره قول امين
عبدالرحمن:امين
الحاج حسين:يعني لما اقولك توب ماتقوليش هو انا بعصي ربنا........ التوبه دي هتبقي مستمره معاك لحد ماتموت يعني بعد ماتلتزم ماتقولش خلاص انا كده كويسه لااااااا انت لازم تجدد توبتك باستمرار ماشي
عبدالرحمن:ماشي
الحاج حسين:وكمان انت لما تتوب حتحس بسعاده محستش بيها قبل كده
عبدالرحمن:بس انا سعيد في حياتي ......قبل وفاه محمود كنت بعمل كل اللي انا عايزه في الوقت اللي انا عايزه
الحاج حسين :بص يابني دي سعاده وهميه هتحس بالفرق بعدين وهتقول عم حسين قالي
وبعدين انت لو قاعد في مكان دبغ الجلود طبعا عارف الريحه اد ايه كريهه
انت بقى مش هتعرف ان الريحه دي كريهه الا لما تخرج منها لانك وانت فيها متعود عليه وكأنها شئ طبيعي انت اتعودت علي المعصيه وكأنها اصبحت عادة وحبيتها ووهمت نفسك ان دي السعاده ابدا والله عارف السعاده الحقيقيه فين
عبدالرحمن:فين
الحاج حسين :في طاعه ربنا يابني والله والقرب منه بص انا عايزك تفر لربنا من كل حاجه تفر لربنا من هواك والمعاصي وكل ذنوبك من كل حاجه تبعدك عن ربنا
انت عارف لما تحقق اللي قولتلك عليه مين هيفرح بتوبتك اوي
عبدالرحمن:اكيد حضرتك طبعا لانك اللي دلتني علي الطريق
الحاج حسين: اكيد ان شاء الله هفرح بتوبتك....... بس
الله هو الذي سيفرح بيك اوي
اسمع معايا الحديث ده كده
عبدالرحمن:ايوه بأذن قلبي صح
الحاج حسين :ايوه اسمع كده
سمعت رسول الله صلى الله عليه وسلم يقول لله أشد فرحا بتوبة عبده المؤمن من رجل في أرض دورية مهلكة معه راحلته عليها طعامه وشرابه فنام فاستيقظ وقد ذهبت فطلبها حتى أدركه العطش ثم قال أرجع إلى مكاني الذي كنت فيه فأنام حتى أموت فوضع رأسه على ساعده ليموت فاستيقظ وعنده راحلته وعليها زاده وطعامه وشرابه فالله أشد فرحا بتوبة العبد المؤمن من هذا براحلته وزاده
تخيل فرحة الرجل اد ايه لما كان خلاص استسلم للموت بعد ماضاع منه كل حاجه وفجأة رجعتله متخيل معايا فرحته اد ايه
الله الملك
فرحته بيك وانت راجعله وتقول انا جيتلك يارب تائب اليك فاقبلني.. فرحة الله عز وجل بيك اكتر من فرحه الرجل برجوع دابته اليه
و اسمع كمان الحديث ده
يقول النبي صلى الله عليه وسلم فيما يرويه عن ربه عز وجل، قال: ((إذا تقرب العبد إلي شبراً تقربت إليه ذراعاً، وإذا تقرب إلي ذراعاً تقربت منه باعاً، وإذا أتاني يمشي أتيته هرولة)) رواه البخاري
يعني تخيل انت لما ترجع من العمره ان شاء الله هتكون واحشني ازاي واول مااشوفك هفرح بيك اوي ولله المثل الاعلي
سامع ومن اتاني يمشي اتيته هروله سبحان الذي يتودد الي عباده وهو غني عنهم
انت بس اقبل علي ربنا بقلبك.... انا هستناك الفجر وان شاء الله دي هتكون اول جلسه شروق تقعدها معايا اتفقنا انا عايزك لما تروح تفكر في الكلام اللي قولتهولك وتطبقه مش تسمع وخلاص والفجر ان شاء الله نتقابل وانت علي وعدك معايا بالنسبه لسها
عبدالرحمن:احنا مش قلنا سها علي جنب دلوقتي
الحاج حسين:اه علي جنب يعني مالكش دعوه بيها يا عبدالرحمن...... الله شهيد علينا وعلي فكره الحل ده مؤقت لان البنت دي مش هتسيبك ..الحل النهائي لما ترجع ان شاء الله من العمره
عبدالرحمن:طب براحه عليه واحده واحده كل ده ومؤقت امال لو كان نهائي كنت هتقولي ايه
الحاج حسين: انا عارف انك صعب ان انت تسيها عشان ماتقوليش اني مش حاسس بيك...... بس البنت دي هتفضل عقبه في طريقك لو مالتزمتش باللي قولته مالكش دعوه بيها لحد ماتسافر
عبدالرحمن:ربنا يسهل
الحاج حسين:اصدق الله يصدقك
عبدالرحمن:يعني ايه
الحاج حسين:يعني لو ربنا اطلع علي قلبك وشاف فيه صدق علي عزمك انك تسيها هيعينك انوي بس انت واصدق الله
عبدالرحمن:اصدق الله ازاي
الحاج حسين:قوم في التلت الاخير بين يدي الملك وقوله ياااااارب انا عايز اسيبها بس مش قادر وانت يا رب القادر على كل شىء وألح في الدعاء بس تكون صادق
عبدالرحمن:هحاول
الحاج حسين:لا هتنفذ مش هتحاول
محمد:وانت عملت ايه .......
يتبع ان شاء الله