[الشافعى الصغير]

 

زمارة الخطر

كتب على سلامة
فاكر..
زمارة الخطر
وطفى النور
وأكياس الرمل
وقدام كل بيت ساتر..
فاكر..
أيام السهر
والامتحانات
وكوباية شاى من إيد أمك
وإنت بتذاكر..
كنت بتفرح لما تنجح
أو حد يقول عليك شاطر..
فاكر الأمان
ننام وفاتحين البيبان
دلوقتى فى كل شارع لجنة
وف كل بيت عساكر..
مين اللى قال
البحر غادر..
مين اللى قال إنك خلاص تعبان
ومش قادر..
ومين العبقرى
اللى سماك
شحات وعريان وصابر..
هو إحنا توهنا من بعض
هو إحنا ليه ماشيين
وباصين فى الأرض
هو إحنا لسه بنحلم
وبنحاول
وبنعافر..
سؤال لا كان ع البال
ولا ع الخاطر.
أسأل عليك يقولوا نايم!
وتسأل عليا يقولولك سافر!
دلوقتى فى كل ثانية
بنسمع الزمّارة
وبدال الغارة ألف غارة
لكن لا بيصحى شارع ولا حارة..
وكل واحد فينا محتاج مليون أمارة
علشان يحس بالخطر
يا ساتر..