رسم قلب
كتب على سلامة
يعدي الوقت تقيل..
ويمر بسرعة قوام..
ياه..
هي الساعة كام..
أشرب السيجارة دي..
وبعدين أنام..
لكن مفيش..
حاجات كتير..
مابتسمحليش أبداً بالنوم..
أما النهارده دا كان حتة يوم..
شاف الدكتور رسم القلب..
وراح واخدني علي جنب..
وكشر في وشي..
كإني عملت ذنب..
وقاللي انت عايش إزاي..
قلت له زي كتير عايشين..
قاللي تخس شوية انت تخين..
وم النهارده مفيش تدخين..
بلاش انفعال..
وفرفش وطنش وافرح..
وبطل شغل العيال..
وكلام المجانين اللي بتكتبه..
بصيت جوايا..
مبقتش عارف..
أصدقه واللا أكدبه..
قلت له اديني حبة فرح..
وأبقي عيل لو قلتلك مش عايز..
قاللي إيه..
قلت له ما تيجي نعيد رسم القلب..
مش يمكن الجهاز بايظ..
أنا أصل اليومين دول قلبي طاير..
ومش علي بعضه..
بصلي وقال للتمرجي..
دخل اللي بعده..
وقاللي أشوفك بعد شهر..