|
|||||||
| الملتقى الشرعي العام ما لا يندرج تحت الأقسام الشرعية الأخرى |
 |
|
|
أدوات الموضوع | انواع عرض الموضوع |
|
#1
06-03-2010, 02:53 AM
|
|||
|
|||
غرباء !! 000(قصة)
هذه القصة0000 قصة إجتماعية إلى حد ما تدور أحداثها حول التدين ومفهومه ومتاعب الملتزمين ومشاكلهم مع أنفسهم وأهليهم ومن حولهم ومشاكلهم مع الحكومة والسياسة وأميركا والصهاينة! أحلامهم وطموحاتهم وهمومهم وطريقة تعاملهم مع العديد من المسائل والمشاكل أخى الحبيب000أختي الفاضلة قد تجد نفسك أحد أبطال القصة بل حتماً ستجد نفسك أحدهم وإن لم تجد نفسك بطلاً فستجدها كومبارس ! لن أخترع شخصيات وهمية من المريخ مثلاً بل هي شخصيات واقعية نقابلها كل يوم وليلة! وهناك الكثير من الأشياء التي لن أفصح عنها إلا في وقتها ومن خلال أحداث القصة والتي أتمنى أن تنال رضاكم لأنال دعواتكم بإذن الله كالعادة القصة ستكون على شكل حوارات وبالعامية لمصداقية القصة وسهولة وصولها للجميع(ولحين توقيعي معاهدة سلام مع النحو! ) وأريد الإشارة إلى أن القصة ليست مجرد سرد أو" حدوتة " وإنما لها أهداف كثيرة جداً فتلمسوا هذه الأهداف بين سطورها وآمل حقاً أن تعجبكم فكرتها وإسلوبها ومضمونها وبإذن الله تعجبكم في مجملها والله من وراء القصد بالله عليكم لا تنسوا أخيكم الفقير إلى الله من صالح دعواكم جزاكم الله الجنة ووقتا مفيداً ممتعاً بإذن الله محمد 
|
|
#2
06-03-2010, 02:57 AM
|
|||
|
|||
|
يا محمد 000يا محمااااااااااااااااااااااد
محمد: أيوة يا نهى جاي أهو! نهى:إيه ياعم؟! 00نص ساعة تسرّح شعرك إمال لو بنت كنت عملت إيه؟! محمد(ضاحكاً): اسئلي نفسك وإنتى بقالك 10 أيام أصلاً بتجهّزي نفسك للمشوار دة!! نهى: يا سلام يا خويا 00ليه هو إعتكاف؟! محمد:ههههههه نهى:أنا بجهّز مع ماما الحاجات الي هنأخدها معانا في المصيف عشان هنقعد إسبوع هناك فلو نسينا حاجة هتبقى مشكلة كبيرة! إنت عارف إنه إسبوع واحد في السنة ولازم نستعد له كويس محمد:خلاااص00إنتى هتديني محاضرة؟! الأم: إيه يا ولاد صوتكم عالي ليه؟! 00ابتديتوا الخناق من دلوقتي مش تستنوا لما نوصل طيب وإن شالله تقطّعوا بعض!! نهى(ضاحكة): لا ياماما متقلقيش00السنادى هنرجع ناقصين واحد! الأم: ليه يا بنتي بعد الشر؟!000 نهى(ضاحكة): لأني ناوية أغرّق محمد في البحر!! محمد(وهو يضربها على كتفها): طب يلا قدامي 00وهنشوف مين الي هيغرّق التانى الأم: اوعوا يا ولاد هزاكم يقلب جد وألاقيكم إنتوا الإثنين غرقانين! ضحك الجميع في حين قالت نهى أهو على الأقل نريحك يا ماما! الأم:وهي في أم ترتاح بعيد عن أولادها يا بنتى؟000ربنا يخليكم ليا يا رب محمد:طب يلا يا جماعة عشان بابا جاب العربية أهو وعمال يدينا كلاكسات الأم:إمال فين راندا؟ نهى:راندا تحت من بدري يا ماما الأم: طب يلا بينا 000شيل يا محمد محمد(معترضاً): هو يعني محمد الشيّال بتاعكم؟! نهى:يا خويا شيل بلاش غلبة 00مش عاملي فيها راجل!! طب شيل بقى يا سي الراجل!! محمد(متوعداً):حاضر00اصبري بس عليا لما نوصل! يتبع00000000000
|
|
#3
06-03-2010, 02:59 AM
|
|||
|
|||
|
وفى الطريق إلى الإسكندرية الأب:مبسوطة يا راندا؟ راندا: قوي يا بابا محمد:بس يا بابا إسبوع مش كفاية! إنت ناسي إني خارج من الحرب العالمية الثانية؟! ومحتاج راحة جامدة! الأب(ضاحكاً): هو إنت لسة بتسميها حرب عالمية؟! محمد:طبعاً يا بابا 000ماهو الثانوية العامة بمرحلتيها مايتقالشي عليها غير كدة000حرب عالمية أولى وثانية!! نهى:قال يعنى الواد كان مقطع نفسه في المذاكرة قوي! محمد(بغيظ):وإنتي مالك إنتى خليكي في نفسك000 المهم النتيجة الأم:بإذن الله مش هتقل عن 95% زي السنة الي فاتت نهى: أشك! محمد:ليه هو إنتي إبرة؟! بكرة تشوفي ثم التفت إلى والده قائلاً محمد: ها يا بابا؟ مش ممكن نمد المصيف لعشر أيام عالأقل؟! الأب: إنت عارف اليوم الواحد بيتكلف كام ياسي محمد؟! همابالنسبة لك مجرد 3 أيام زيادة إنما بالنسبة لي أنا كارثة! 000بكرة تتجوز وتعرف وبعدين إنت لسة قايل بنفسك إنك خارج من الحرب العالمية الثانية وطبعاً الحرب دي مكنتش فيها لوحدك كنا فيها كلنا لمدة سنتين دروس خصوصية ومصاريف وكتب ومراجع وسيديهات و000 قاطعه محمد خلاص يا بابا عرفت000 دة كان مجرد طلب! الأب:عاوز أعودك عالمسؤولية يابني000لأنك لو كنت حاسس بيها مكنتش طلبت طلب زى دة محمد: عندك حق يا بابا0000أنا آسف! الأب: المهم إننا نتعلم نهى: والأهم النتيجة الي هتبان وإحنا في المصيف الأم: خلي بالك يا محمد نهى شكلها ناوية تضيّع عليك فرحة المصيف وتقلقك بالنتيجة! محمد: لا يا ماما ماتقلقيش أنا من أول يوم هحدفها في البحر وأخلص منها! نهى(بإستنكار): لا يا شيخ؟! الأب: صحيح يا محمد000متعرفشي أخبار الشيخ محمود إيه؟ محمد(بدهشة): الشيخ محمود؟! الأب: أيوة000محمود إبن عمتك محمد(ضاحكاً): هو عشان ربى دقنه بقى شيخ؟! الأب:مش عارف الواد دة إيه الى وصله لسكة اللحية دي؟!!! أكيد من أصحابه الي بقى يقابلهم في الجامع000امه إتصلت بيا إمبارح بالليل واشتكت لي منه وقالتلي إنها خايفة عليه من السكة دي محمد:يا بابا أنا مش عارف إنتوا قلقانين عليه ليه ؟ ماتسوبوه يربي ذقنه ويلبس الجلابية ويروح يحضر الخطب ! 000هو التدين وحش؟! الأم: يابنى الناس بتخاف على ولادها!!! محمد: من إيه بس يا أمي؟ الراجل تدين مش كفر!! أوقف الأب السيارة بصورة مفاجأة على جانب الطريق مما أفزع الصغيرة راندا التي كانت قد بدأت تغض في نوم عميق وإلتفت الأب إلى محمد وسط دهشة الجميع وسأله الأب: يعنى إنت موافقه يا محمد؟ إبتلع محمد ريقه ثم قال محمد:يابابا أنا لا موافقه ولا مش موافقه!!000يعني مش مع الي عمله ولكن في نفس الوقت مستغرب من خوفكم على شخص عاوز يبقى مسلم بحق وحقيقى! الأب: هو إحنا مش مسلمين يا محمد؟! تفاجأ محمد بالسؤال وسكت فكرر عليه الأب نفس السؤال فرد قائلاً محمد:معرفشى يا بابا بالضبط 000 إحنا أكيد مسلمين000لكن في ناس مسلمين إسماً بس!!!! الأب(بصرامة):طب اسمعنى كويس بقى00000كلام تاني في الموضوع دة مش عاوز نهائي ومحمود انساه خالص!!! وإياك إياك تفكر تبقى زيه في يوم من الأيام فاهم؟! محمد:ليه دة كله يا با000000 قاطعه الأب بحدة وصرامة وصوت عالِ قلت مش عاوز كلام تاني في الموضوع ثم أدار السيارة مرة أخرى وواصل الجميع طريقهم في صمت مطبق حتى وصلوا! يتبع000000
|
|
#4
06-04-2010, 11:50 AM
|
|||
|
|||
|
وفي بيت محمود دخل محمود إلى البيت في وقت متأخر كعادته ووجد والدته في إنتظاره محمود:السلام عليكم الأم:وعليكم السلام ورحمة الله وبركاته ظلت الأم تتابع إبنها وهو يخلع حذائه ويضعه في مكانه قبل أن تقول الأم:إنت كل يوم هتسهرني معاك كدة يابني؟! محمود:محدش قالك اسهري يا أمي! الأم:قلقانة عليك يابني 000غصب عني أعمل إيه؟000قسمتي كدة! محمود(بصبر):وقلقانة عليا ليه يا أمي؟ الأم:من سهرك بره طبعاً يا محمود محمود:منا طول عمري بسهر يا أمي ومش كنتي قلقانة زي دلوقتي000إيه الي جد يعني؟! الأم:بص لنفسك وإنت تعرف! شوف الأول كنت بتسهر فين فكنت مطمئنة عليك ودلوقتي بتسهر فين فبقلق عليك محمود(في دهشة): معقولة يا أمي؟! تطمني عليا وأنا مع أصحابي بنتسكع في الشوارع ونعاكس البنات ونتريق ونضحك على خلق الله وتقلقي عليا لما أروح أحضر خطبة لشيخ أو أحفظ قرءان أو أتعلم ديني؟!!!! الأم: أنا مش عاوزة فلسفة يا محمود!0000ومن الآخر كدة السكة الي إنت ماشي فيها دي لازم تسيبها!لازم تحلق ذقنك دي ولازم تلبس زي بقيت خلق ربنا وتسيب أصحابك الي عاملين زي الإرهابيين الي بنشوفهم في التليفزيون! ثم نظرت إليه في ضيق قبل أن تقول دة إنت حتى بقيت شكلهم! بقى دة محمود إبني الي أنا أعرفه؟!إنت بقيت شخص تاني خالص يا محمود ولازم ترجع محمود وإلا هيبقى لي معاك تصرف تاني! محمود:مش عارف أقولك إيه يا أمي؟! 000بس أنا لا هشيل لحيتي الي بحس بمتعة وأنا مربيها ولا هسيب أصحابي الي فعلاً حسيت معاهم بمعنى الصداقة والإخوة والحب في الله 00ومحمود بتاع زمان دة يا أمي مستحيل يرجع تاني 000مستحيل! الأم(تصرخ): ومشمعنى إنت يا بنى؟! ما كل ولاد العيلة ماشيين كويسين ومنفتحين عالدنيا ومستمتعين بيها؟ مشمعنى إنت مُصِر تعذبني معاك كدة؟! محمود:أنا مش بعذِّب حد يا أمي00إنتي الي معذبة نفسك مش عارف ليه؟! الأم:وهو الي بتعمله فيا دة مش عذاب؟! هو ربنا قالك عذب أمك؟! فين طاعة أمك يا محمود يا متدين يا الي تعرف ربنا؟! محمود(بصرامة وآلية): لا طاعة لمخلوق في معصية الخالق! الأم: أهو دة الي بخده منك! مجرد كلام إنت نفسك مش فاهم معناه! محمود:قصدك إيه يا أمي؟ الأم: وهو مش طاعة أمك طاعة للخالق يا سي محمود؟! 000وهو لما أطلب منك ما تسهرشي برة كتير يبقى بطلب منك تعصي ربنا؟!000مش عيب عليك تبقى راجل البيت بعد والدك الله يرحمه وتسيبني أنا وأختك طول النهار وما ترجعشي إلا آخر السهرة ؟! لا تشوف طلباتنا ولا تطمّن علينا ولا تعبرنا حتى بتليفون؟! عموماً النظام دة ما ينفعنيش وأنا كلمت خالك عشان ييجي يشوفلنا حل للموضوع دة وهو قالي هييجي يكلمك لما يرجع من المصيف ربنا يسامحك يا محمود000بس لعلمك يابني أنا غضبانة عليك وخلي بقى التدين ينفعك وأنا غضبانة عليك0000دة يعني لو كانوا علموك وفهموك كويس يعني إيه غضب الأم! تضايق محمود من كلام والدته وأغلق على نفسه غرفته وأخذ يفكر فيما قالته صحيح يا محمود إنت إزاي تسيب أمك وأختك طول النهار وهما مالهمشي غيرك؟! وبعدين إزاي أرضي أمي وفي نفس الوقت أرضي ربنا؟! وأعمل إيه مع خالي لما ييجي يكلمني؟ دة راجل صعب قوي! ثم رفع رأسه إلى السماء وهو يقول يارب وفقني لما تحبه وترضاه وثبتني واهدي أمي وأختي وعائلتي! يارب أنا ماليش غيرك فلا تتركني أرجوك يتبع00000
|
|
#5
06-04-2010, 11:56 AM
|
|||
|
|||
|
مالك يا محمد ؟0000000من ساعة ما وصلنا يابني وإنت حالك مش عاجبني نظر محمد إلى والدته بدون أن يرد بحرف فجلست على سريره وربتت عليه بحنان وهي تقول الأم: اوعى يا محمد تزعل من كلام بابا!000000إنت عارف هو بيحبك قد إيه وإنه خايف عليك محمد: خايف عليا من إيه بس يا أمي؟! الأم: إحنا هنعيده تاني يابني؟!0000انسى بقى الموضوع دة واستمتعلك يومين قبل ما النتيجة تبان وبعدها التنسيق ووجع الدماغ! انت بقالك سنتين يابني مطحون والإسبوع دة فرصة ليك ما تضيعهاش عشان كلمتين! محمد: عندك حق يا ست الكل000كلامك صح الأم(مستبشرة): طب يلا بقى وريني شطارتك 000إنت مش كنت بتقول هتحدف نهى في البحر وتخلص منها؟! 0000أهي هناك عالبحر بتعلم راندا العوم!000وريني بقى هتعمل إيه؟! محمد(ضاحكاً): بتعلم راندا العوم؟! مش لما تبقى تتعلم هي الأول! ثم نزل إلى البلاج يبحث عن أختيه حتى وجدهما في ركن بمفردهما فذهب ناحيتهما ضاحكاً محمد(بسخرية): انتي بتعملي إيه يا نهى؟!وبعدين إيه الي إنتي لابساه دة! بقى جاية تلبسي الحجاب في البحر؟! نهى: أهلاً بمتعوس بيه! إنت مش كنت زعلان وحزين يابني إيه الى جابك؟! محمد: جيت أنفذ كلامي وأغرقك! نهى: يا سلام؟! طب لو راجل تعالى محمد: قوليلي بس إيه الي إنتي حاطاه على راسك دة؟! نهى: أعمل إيه بس؟ 000المية هنا مش نضيفة قوي وخفت على شعري فلبست الإيشارب دة! محمد(وهو ينزل للبحر):ماشي يا شيخة نهى!!! يارب تكون تكون بُشرة خير نهى: بعد الشر عليا!!!!هي ناقصة فقر! محمد(بدهشة): الحجاب فقر؟! نهى: أيوة طبعا0000ًكل البنات الي بيلبسوه بيبقى شكلهم فقر! محمد: بس الي أعرفه إن زوجات النبي(عليه الصلاة والسلام) كانوا بيلبسوا نقاب مش بس حجاب! نظرت نهى لأخيها نظرة إستياء ولم ترد وإنما توجهت إلى راندا وهى تقول نهى: ها يا راندا؟!اتعلمتي أول درس ولا لأ؟ راندا: صعب قوي يا أبلة نهى! محمد: سيبك من الهبل دة يا راندا000أنا أول ما نرجع هقول لبابا يوديكي النادي تتعلمي السباحة صح نهى: نادي إيه يابني إنت دي لسة 7 سنين محمد: طب وإيه يعنى ما أصغر منها وبيروحوا يتعلموا!وبعدين لما تتعلم وهي صغيرة أفضل لها بكتير نهى: إمال أنا بعمل إيه دلوقتي ؟000000منا بعلمها أهو! محمد(ضاحكاً): يا شيخة روحي ! مش لما تبقي تتعلمي إنتي الأول ! نهى(متحدية): كدة يا محمد؟!000طب إيه رأيك نعمل سباق لغاية الجزيرة الي هناك دي ونشوف مين هيسبق التاني! محمد(بسخرية): ما بلاش!!!!! نهى: يلا بلاش غلبة0000وريني بقى هتسبقني إزاي راندا(منتبهة): إيه دة؟00إنتوا هتمشوا وتسيبوني؟! محمد: جرا إيه يا بت؟ دة إحنا هنروح لغاية الجزيرة دي وراجعين بسرعة راندا: لا أنا أخاف أبقى لوحدي000 طب والله العظيم لأعيط وأصرخ وألم الناس حوليا! نهى: مجنونة وتعملها! ثم إلتفتت إلى أخيها وهي تقول بمرح بقولك إيه يا محمد معاك منوّم؟! محمد(ضاحكاً): وعلى إيه منوّم 0000ما إنتي موجودة أهو! اديها رُسية بس وهي تروح في سابع نومة!!!!! نهى: واشمعنى أنا يعني؟0000ما تديها إنت رسية! محمد: عشان إنتي راسك ناشفة زي الصخر! نهى: طب تعالى بقى ثم أخذ الإثنان يتقاذفان بالماء ويشدان بعضهما في البحر وراندا تضحك عليهما بمرح وسعادة يتبع000000
|
|
#6
06-05-2010, 09:51 AM
|
|||
|
|||
|
دخلت الأم على زوجها مستبشرة الأم: خلاص يا فتحي0000محمد نزل البحر ونسي الموضوع الأب: بجد؟000الحمد لله الأم: فكها بقى إنت كمان 00000مش عاوزة الرحلة تقلب بغم! الأب: مش عارف الي عملته دة صح ولا غلط الأم: عاوز الحق0000إنت قسيت عالواد حبتين الأب: ماهو من خوفي يا سهير! إنتي عارفة كويس أنا عملت كدة ليه الأم: عارفة! 0000بس محمد مالوش ذنب 000بصراحة يا فتحي لو إستمريت على إسلوبك دة هيحصل عكس الي بتتمناه نظر إليها فتحي في دهشة قائلاً قصدك إيه؟! سهير: قصدي إنك عارف محمد كويس وإنه دايماً بيحب يقتنع بأي شيء نقولّه عليه أما إسلوب التهرب وفرض الرأي دة فمش ينفع معاه فتحي(بحدة): إلا دي!0000مستعد أقنعه بأي شىء إلا الموضوع دة 000لأني مش مستعد أفتحه أصلاً! سهير: طب وأخرتها؟! فتحي: مالهاش أول عشان يبقى لها آخر! الموضوع إنتهى خلاص ثم نظر إلى الأرض شارداً فتحي: كفاية الي حصل لجدي الله يرحمه من تحت راس الموضوع دة! سهير: بس جدك كان إخواني يا فتحي0000وإتعذِّب في السجون أيام عبد الناصر لأنه كان إخواني فتحي(صارخاً): لأ!!! لأنه كان متدين والتدين وصله للإخوان والإخوان وصلوه للسجن والتعذيب لغاية ما إتعمى في السجن ولما خرج ما كملشي سنة ومات! ولما أخذوا أبويا وهو لسة عريس جديد أخذوه لمجرد إنه إبنه! ولولا إن أبويا تبرأ من الإخوان ومن التدين نهائي ما كانوا سابوه لغاية دلوقتى! وعشان كدة ربانا الله يرحمه على كره التدين والمتدينين بسبب الي حصل لجدي ودة الي لازم نعلّمه لولادنا 00000عشان كدة سعاد خايفة على محمود إبنها وأنا خايف على محمد رغم إنه بعيد عن السكة دي سهير: مش عارفة أقولك إيه يا فتحي! فتحي: ماتقوليش حاجة0000المهم تساعديني وبلاش الجدال كل شوية في شىء مفروغ منه0000إحنا مسلمين محدش يقدر يقول غير كدة000وربنا رحمته واسعة وكمان ربنا ما يرضاش إنه يحصلنا زي ما حصل لجدي ! هو مش ربنا قال "ولا ترموا بأيديكم إلى التهلكة"؟! يبقى ليه محمود والي زيه بيرموا نفسهم للتهلكة؟! ليه؟!!! يتبع0000
|
|
#7
06-05-2010, 07:15 PM
|
|||
|
|||
|
بارك الله فيكم
|
|
#8
06-05-2010, 11:04 PM
|
|||
|
|||
|
السلام عليكم ورحمة الله وبركاته
ما شاء الله ان شاء الله لي عودة في انتظار التتمة
|
|
#9
06-06-2010, 09:19 AM
|
|||
|
|||
|
وعليكم السلام ورحمة الله وبركاته
وبارك فيكم جميعاً محمد
|
|
#10
06-06-2010, 09:25 AM
|
|||
|
|||
|
دخلت نهى بلهفة على أخيها وهي تصرخ نهى: يا محمد0000000النتيجة بانت!!! محمد(بدهشة): بانت؟!!0000المفروض إنها هتبان بكرة الصبح! نهى:أيوة دة في المدارس بس هي بانت دلوقتي عالنت! محمد: مين الي قالك؟ نهى: ريهام صاحبتي اتصلت بيا وقالتلي إن أبوها راح يجيبلها النتيجة من السايبر محمد:يارب استرها ثم خرج يجري وهو يبحث ويسأل عن سايبر قريب حتى وجده وبه بشر كثيرين! محمد(فى نفسه): بقى كل دول عرفوا قبلي؟!! دخل محمد للسايبر بصعوبة وسط الزحام وأصوات الزغاريط والفرح للناجحين متزامنة مع أصوات الصراخ والبكاء للراسبين أو ذوى المجاميع الضعيفة! نظر محمد إلى الأجهزة الخمسة عشرة الموجودة في السايبر فوجد على كل جهاز مالايقل 10 منتظرين نتائجهم هذا غير المصاحبين لهم! فذهب إلى أحد الأجهزة وتحدث مع الجالس عليه محمد: هو الرقم بكام لو سمحت أجابه الشاب بدون أن يرفع عينه من على جهازه ب50 جنيه! محمد(بدهشة): ياه! بس دة كتير قوي الشاب: لا مش كتير لأننا شاريين الإسطوانة أصلاً ب500 جنيه! محمد: إسطوانة إيه؟ الشاب(وهو مايزال فى عمله): الإسطوانة الي عليها النتيجة0000لأن الوزارة وزعتها عالسيبرات على إسطوانات محمد: معقولة؟!!!! الوزارة نفسها بتَّاجر بالنتيجة؟! إلتفت إليه الشاب مبتسماً وظهرت لحيته الخفيفة وهو يقول إنت باينك على نياتك! الحكومة يا حبيبي مش بتسيب أى فرصة إلا لما تستغلها عشان تجمع فلوس ! يعني عندك الوظايف الي بيعلنوا عنها كل كام شهر ويقولولك ادفع خمسة جنيه للإستمارة! خمسة مني على خمسة منك على خمسات من آلاف العاطلين بيجمعوا مبلغ وقدره وفي النهاية الي بيتعينوا أعداد معدودة ومعظمها بوسايط كمان والإستمارات دي بتترمي في الزبالة!!!!!!!! عندك عربيات التبرع بالدم الي موجودة في كل حتة دلوقتي أنا ستى كانت تعبانة جداً وعاوزة نقل دم ودمنا كلنا كدة مكفهاش لأنها بتنزف بغزارة من أنفها 0000المهم قالولنا كيس الدم ب125 جنيه!!!!! يعنى بيخدوا الدم ببلاش وبيبوعوه بسعر غالي جداً وإنت وقت الزنقة بتدفع غصب عنك دة غير حاجات كتيييير 000البلد كلها لصوص يا أخي جت على نتيجة الثانوية! إحدى الحاضرات: يا خويا خلص وشوفلي نتيجة البت 0000هو دة وقته مش كفاية دافعين خمسين جنيه؟!!!! الشاب:حاضر يا حاجة00000وبعد برهة000مبروك يا حاجة بنتك جابت 91% تركها الشاب تزغرط وتفرح هي وبنتها وإلتفت لمحمد هاتلي رقم جلوسك إنت باين عليك راجل طيب! محمد:لا معلشي أنا هستنى دوري0000الناس دي جاية قبلي! الشاب(ولم تفارقه الإبتسامة):مش بقولك راجل طيب! ثم إلتفت إلى غيره قائلا هات يا حاج وعندها رن موبايل محمد ووجد نهى تستفسر لأن والدها ذهب لسيبر آخر لنفس الغرض فقال لها بعد دقائق سأعرف وهتصل بيكم وأثناء ذلك حاول محمد التخفيف من حدة قلقه المتصاعد بكلامه مع الشاب محمد: بس إنت شغال في السيبر دة إزاي؟! أنت باين عليك راجل ملتزم وأنا سمعت إن الشغل في السيبر حرام لأنه بيبقى معظمه للشات والأفلام والألعاب ! دة غير حاجات تانية الشاب (دون أن يلتفت): أنا مش شغال فيه ولا حاجة000دة صاحب السايبر صاحبي من زمان وإستنجد بيا عشان أساعده في الليلة دي محمد: طيب يا أخي هو ما ينفعشي الإلتزام بدون لحية؟! نظر إليه الشاب بدهشة لبرهة ثم عاد لعمله الشاب:هو ينفع البنت تدخل مدرسة خاصة بلبس سهرة؟! ينفع البنت المسلمة البالغة تمشي من غير حجاب؟! 000ينفع أروح أزرع في الغيط ببدلة سموكن! الإلتزام دة نعمة من عند ربنا والملتزم يعرف كويس إن اللحية دي فرض من عند ربنا فطبيعي إنه يربيها! محمد: أيوة بس اللحية مش فرض! الشاب: الي يقولك كدة غلطان لأن العلماء اتفقوا على أنها فرض محمد: فلنفرض إنها فرض! 0000بس أكيد الضرورات تبيح المحذورات 000وإنت عارف إن في ضرورات تبيح لك أن تحلقها الشاب: قصدك الأمن يعني؟! قالها ببساطة أدهشت محمد الذي كان يخشى من مجرد ذكر ذلك فى مكان عام وقال نعم! الشاب:لو الأمن قالك ما تصليش مش هتصلى؟00000لو الأمن قال للبنات ماتلبسوش حجاب مش هيلبسوا؟! دى كله إختبارات وبلاءات من الله يا أخى وكلها فتنة كما قال الله عز وجل "أحسب الناس أن يتركوا أن يقولوا آمنَّا وهم لا يفتنون" وأظنك عارف إنه لا طاعة لمخلوق في معصية الخالق وبعدين الحمد لله الحال إتعدل شوية مش زي فترة التسعينات الي كانوا بيخدوا فيها أي حد ملتحي فقط لأنه ملتحي! محمد:إمال دلوقتى بيخدوا مين؟! ضحك الشاب وهو يواصل عمله بدون تردد لسة برضه بيخدوهم وإن ما خدوهومشي دلوقتي يبقى في قوائم الإنتظار!!! قصدي المشبوهين بس برضه مش زي الأول000يعني بيصبروا عليه لما يبدأ يحضر دروس علم في مساجد معينة ولشيوخ معينين يعني دة لو محدش من العفاريت وشى بيه! محمد: عفاريت إيه؟!!!!! حان دور محمد والشاب يلتفت إليه ويغمز وإبتسامته مازالت على شفتيه المرشدين يا أخ 0000000مش بقولك إنت راجل طيب!! يلا هات رقم جلوسك! كان محمد مندهشاً من كلام الشاب إلا أنه بمجرد أن جائت سيرة رقم الجلوس والنتيجة نسى كل شيء وحل القلق الشديد مكان كل شيء والشاب يدخل الأرقام ويضغط على الزر لمعرفة النتيجة يتبع(إن شاء الله)000000000000
|
|
| الكلمات الدلالية (Tags) |
| !!, 000(قصة), غرباء |
| الذين يشاهدون محتوى الموضوع الآن : 1 ( الأعضاء 0 والزوار 1) | |
| أدوات الموضوع | |
| انواع عرض الموضوع | |
|
|
العرض العادي
