يوميات طبيب امتياز ـ مراسلنا فى المستشفى ـ

[الشافعى الصغير]

لو تريد ان تكون ايجابيا ابدأ حملة تبرعوا لتحديث اجهزة كلية طب المنصورة واذهب للعميد حاول اقناعه بالفكرة وهى فكرة صعبة جدا لتعارض المصالح

فمثلا بعض اجهزة القصر العينى الفرنساوى معطلة واذا اردت ان تعمل اشعة عاجلة فما عليك الا ان تعبر الشارع لتجد مركز الدكتور فلان الفلانى للاشعة وهو كله اكل عيش

جزاكم الله خيرا على هذه المبادرة بس والله العيب مش فى ضعف الإمكانيات ولا عدم وجود الأجهزة ، الأجهزة موجودة والإمكانيات متاحة حتى لو مش بالكامل بس الامور بتمشى ، ممكن من اللى شوفته اقول انه عدم اهتمام كافى يعنى ضعف الإمكانيات مكنش السبب انه يفصل قبل السؤال ولا يستنى يشوف الوصله هتنفع ولا لاء هو استعجال من وجهة نظرى ، أى خطأ بيكون نتيجة استعجال ومش هتفرق 5 دقايق تأخير فالله المستعان

شفوا الرقبة

مش عارف اجيب كلمة بمعنى تانى بس انا هشبهالك بحتة لحمة وعليها عضم وجلد ولما تلاقى الجزار طلعلك اللحمة بس ورمى العضم والجلد ـ هى تقريبا كده ـ كانوا بيشفوا الزور علشان يفصلوه من اللى حوليه ويشلوه لوحده ومعلشى بقى اللغة ضعيفة

واستنونى الحلقة الجاية

 

[الشافعى الصغير]

اكتب يا تاريخ سجل يا أرشيف
يوميات طبيب امتياز
ـ مراسلنا فى المستشفى ـ

فى يوم 15 مارس وفى تمام الساعة التاسعة صباحا ـ معادى الرسمى ـ روحت فى معادى ومازال الالتزام مستمر ولسة بدور على الراجل بتاع البدلة وجابلى البدلة وعرفت اسمه كمان قولت خلاص العجلة لفت والجواب بيبان من عنوانه
كنت جاى اليوم ده وعارف انا داخل لمين بصيت على الليستة وشوفت الدكتور فين ودخلت
بصراحة راجل محترم جدا ومتعاون للغاية وبيشرح من نفسه الحالة

الحالة الأولى فتق فى البطن وكان هيشيل جزء من البطن من تحت كمان
حضرت العملية من الاول والعيانة اتخدرت تخدير كامل ولأول مرة العيانة متصحاش طوال العملية والدكتور كان بيشرح خطوة خطوة والمساعدين بتوعوا كانوا متعاونين ويشرحوا بصراحة كانت العملية ظريفة جدا مكنش بيعكر صفوها الا ان الجوانتى بيتقطع من الدايثرمى ـ حاجة زى المشرط بتطلع حرارة ـ رغم ان الجوانتى المفروض يستحمل واحد منهم كان لابس اتنين فوق بعض واتقطع وعجيبة برده الخيط يتقطع ميهمش ـ الظاهر العتة وكلاه ـ بس انا استمتعت من طريقة الدكتور فى الشرح وتواضعه وبعد مافصل الجزء اللى تحت من البطن ـ الجلد والدهن اللى فيه ـ وبالصرة ابتدت المواقف الكوميدية بمعنى الكلمة كل دكتور كبير يعدى يقول له اوعى تنسى تعمل صرة ، الصرة فين ، هتعمل ايه فى الصرة ، وفجأة تحولت الصرة لمطلب جماهيرى نسوا العيانة والعملية وبيطالبوا بالصرة سبحان الله عيانة فوق ال60 هتفرق معاها اوى الصرة واللى يجى يقول له فى حالتين ماتوا ـ فيقول له احنا على طريق لما الحالة تفوق ادينى التقرير ـ وعجايب فعلا
المهم الفتق هو صلحه وركب الشبكة وكانت عملية مفيدة جدا ليا ولجميع اللى واقفين
وطبعا والمساعدين بيقفلوا وسط التاكيدات انهم يعملوا صرة لازم يعملوا صرة والحمدلله الصرة اتعملت والعيانة ربنا شفاها بعد حوالى 3 ساعات فى العملية بس كانوا ممتعين جدا
وبكده نتعلم اهم من العملية انك متنساش الصرة لو هتشيلها والشكل الخارجى اهم من الشكل الداخلى
وكمان نستفيد ان الدكتور المحترم اللى بيعلم الناس ، الكل بيشكر فيه وبيدعوله ، غير اللى شايف نفسه
الحالة التانية ازالة المرارة بطريقة ذى المنظار ـ من غير فتح البطن ومش عارف ترجمتها ايه ـ
برده روحت اتفرج على نفس الدكتور ـ لأنى بصراحة بحترمه وبحبه ـ طبعا اول مرة اتفرج على بطن عيان داخل فيها الآلات وطالعة فى التليفزيون ـ فيلم عمرك متنساه او تفكر تسيبه قبل ميخلص ـ
برده الدكتور كالعادة فضل يشرح كل حاجة فى العملية والخطوات وهو شغال والكل استفاد لغاية طلع المرارة وقال عادى مش لازم من اول مرة تبقى متخيل الوضع جوة عامل ازاى بس برده استفدنا
وبعد العملية الكل طبعا بيشكره وبيهنيه ولازم انا اكون منهم ـ لان المرة دى مكنتش بنفاق ـ لانى استمتعت معاه وان شاء الله رايحله الأسبوع الجاى ان قدر الله لنا البقاء
وبكده نعرف ان الكبير كبير ، ومش لازم يبقى سنك كبير علشان تبقى محترم ، الاحترام سلوك مش بالسن

وكفاية كده لانى روحت بعد الحالة
مش معقول هتفرج على حد بعد الدكتور المحترم ده
وكمان رجلى كالعادة
ونويت اشوف حل لرجلى ان شاء الله
وإلى لقاء فى الحلقة الجاية
وياريت متكنش زهقت من الموضوع

هى الكتابة بفلوس يعنى
استنانى بكرة إن شاء الله
ولو غيبت شوفنى فى المستشفى
ولا تنسونى من دعائكم
استنونى الحلقة الجاية مفاجأت غير متوقعة بجد

 

[مجدى غريانى]

طبعا ظريف جدا هذه اليوميات واكيد بتفكرنا لما كنا دكاتره امتياز بس ده من 24 سنه والحال هو الحال-رغم دوام الحال من المحال-
كان النواب بيقولنا ان الوصف بتعنا-hopless----- useless ------blood carier
لكن اتعلمنا -ولما جه علينا الدور علمنا --
لكن ياصديقى اتمنى من هذا المراسل الهمام -ان يصف لنا رحلته القادمه فى الجيش او فى التكليف
مثلا لوكان فى كفر البطيخ او فى نجع فى الصعيد وهو المسئول عن كل وظائف وزير الصحه فى الزمام
كله والبيه الدكتور البيه الدكتور راح ومفبش فى جيبه ريحه الفلوس-
ممكن نحكى ونقول المواقف الاجتماعيه للناس العاديه
لكن رجاء المسائل الفنيه بلاش علشان مانعملشى بلبله -بين العامه والناس تنسى الجانب الانسانى فى مهنتنا وتكبر -اخطاء وارد ان تحدث بدون تعمد- او نظرا لضعف الامكانيات الماديه
وعلى فكره انا معجب جدا بمواضيعك الطبيه ونشاطك وربنا يوفقك -وتكمل رحله السيد ابوالعلا البشرى
د_مجدى طه  

[هجرة إلى الله السلفية]

متابعون
والله المستعان
مش عارفة لو قالوا لي اني احتاج لعملية
حاعمل ايه!؟
اكيد مش حاعملها
 

[د. حازم]

المشاركة الأصلية كتبت بواسطة هجرة إلى الله السلفية

مش عارفة لو قالوا لي اني احتاج لعملية
حاعمل ايه!؟
اكيد مش حاعملها

نسأل الله لكم ولجميع اعضاء المنتدى السلامة والا نموت بسبب العمليات الجراحية وأن نموت على طاعة ولا يعذبنا بذنوبنا ولا يجعلنا نحتاج الى احد من خلقه امين امين  

[أم عبد الرحمن السلفية]

اسأل الله أن يشفي مرضانا ومرضى المسلمين .
جزاكم الله خيراً, وأعانكم الله, ووفقكم لما يحب ويرضى .

 

[الشافعى الصغير]

نسأل الله لكم ولجميع الأعضاء السلامة وسامحونا لو الموضوع سبب للبعض القليل من القلق ولكن ما كتبت هذا الموضوع إلا لانتفع به اولا وينتفع به الآخرون فالله المستعان
ولا اخفيكم سرا انى لا اتمنى ان اموت على تربيزة العمليات ـ إلا ان يشاء ربى شيئا ـ فاتمنى ان اموت صحيحا معافى لانى لا اتوقع هل سأصبر وأشكر فى المرض ام لا
فنسأل الله ان يحسن خاتمتنا جميعا
وانتظرونا فى الحلقة القادمة  

[الشافعى الصغير]

اكتب يا تاريخ سجل يا أرشيف
يوميات طبيب امتياز
ـ مراسلنا فى المستشفى ـ

فى يوم 16 مارس وفى تمام الساعة التاسعة صباحا ـ معادى الرسمى ـ روحت فى معادى ومازال الالتزام مستمر ولسة بدور على الراجل بتاع البدلة ملقتهوش بس لاحظت ان محدش موجود كتير قولت اجازة قالوا لاء مشددين فى الدخول ـ عدد قليل بس اللى يدخل ـ قولت يلا هى طردة ولا اكتر
والمرادى نقيت بدلة من وسط 3 بدل ـ لك تتخيل قلة الحضور بقى ـ المهم دخلت والمفروض رئيس القسم بيطرد الصغيرين ـ لقيته شغال فى حالة بيخلصها قولت سلم يارب سلم الطرد جاى اهو
ونبتدى الحالة الأولى فتق فى اسفل البطن
العيان اتخدر قدامى تخدير نصفى فى المرة الاولى ولا الدموع العيان متخدرش جابوا بتاع تخدير تانى خده المرداى مظبوط وابتدى الباشا يشتغل فى العملية وانا الوحيد اللى من الصغيرين وكل ميبصلى اقول الطرد جاى اهو ـ بس والله الدكتور طلع زوق ومطردنيش ـ شكلها اشاعات طبعا هنا ولا تقدر تسأله انت مهدد بالطرد هتسأل اذاى احمد ربنا انك بتتفرج العملية مخدتش وقت وساب المساعد يقفل والمساعد تكرم عليا وقالى كلمتين اذاى تقفل وحاجات من دى وبكده الحالة الاولى تخلص فى وقت قصير جدا
وكده نتعلم نصيبك هتخده هتخده ، ومتخفش من الطرد واللى تخاف منه ميجيش أحسن منه
الحالة التانية ازالة للغدة الدرقية
كان الدكتور بيعلم حد صغير اذاى يعمل العملية وكان بيساعده فالحمدلله جت بمصلحة وكان بيشرح الخطوات خطوة خطوة وكان ماشى براحة علشان يعلم اللى معاه واحنا واقفين نستفيد برده اهو رزقك هتاخده هتاخده وبرده الامور كانت مستقرة وكالعادة الجملة المعروفة ـ العيانة بتصحى ـ وننتيمها تانى ـ طبعا هى مبتفتحش بس اهو ازعاج برده
قبل نهاية العملية حصل موقف عجيب جدا على التربيزة اللى جنبنا
الدكتور اللى بيعمل العملية جاله موبايل ـ رد عليه وقاله ياباشا انا فى العمليات ومتعقم ـ الباشا يقولوا سيب اللى فى ايدك وتعالى ـ يقولوا اقفل قاله تعالى بقولك ـ طبعا لازم يروح للباشا ويفطى بطن العيان بالفوطة ويسيبه ويمشى ـ هتقولى عرفت المكالمة منين هو اللى حكاها
المهم لما رجع بعد 10 دقايق العيان كان ابتدى يصحى بيقول لبتوع التخدير العيان بيصحى قالوا مانت اللى سبته ومشيت وهات يا كلام
والله هم يبكى وهم يضحك انا معرفتش أضحك ولا أضايق قولت اركز فى الحالة اللى واقف عليها بتفرج
وبرده فى التقفيل المساعد قالنا كلمتين فادونا
وبكده نعرف الباشا كلمك وانت فى بطن العيان ترد عليه لان كلام معاليه كلام معقم والحمدلله على اختراع الفوطة تغطى بيها وترجع هتلاقى العيان مستنيك بس الخوف ترجع مرة تلقيه صحى بجد

وكفاية كده لانى روحت بعد الحالة علشان الليستة خلصت
وكمان رجلى المرادى كانت كويسة
وإلى لقاء فى الحلقة الجاية
وياريت متكنش زهقت من الموضوع

هى الكتابة بفلوس يعنى
استنانى بكرة إن شاء الله
ولو غيبت شوفنى فى المستشفى
ولا تنسونى من دعائكم
استنونى الحلقة الجاية

 

[د. حازم]

منتظرين الحلقة القادمة
ياترى الباشا بعد التليفون راح فين؟  

[الشافعى الصغير]

ياترى الباشا بعد التليفون راح فين؟

رجع يكمل شغله عادى جدا وقفل والعيان قام ولا عرف حاجة
استنونى الحلقة الجاية مفاجأت جديدة كالعادة