منتديات الحور العين


انا لله وانا اليه راجعون... نسألكم الدعاء بالرحمة والمغفرة لوالد ووالدة المشرف العام ( أبو سيف ) لوفاتهما رحمهما الله ... نسأل الله تعالى أن يتغمدهما بواسع رحمته . اللهم آمـــين
 

العودة   منتديات الحور العين > .:: المجتمع المسلم ::. > ( نِــــدَاءُ الإِسْعَــــافِ )

( نِــــدَاءُ الإِسْعَــــافِ ) فازَ رجُلان .. " طبيبُ القُلوب ، وطبيبُ الأبدان " .

إضافة رد
 
أدوات الموضوع انواع عرض الموضوع
  #1  
قديم 03-11-2009, 09:02 AM
الشافعى الصغير الشافعى الصغير غير متواجد حالياً
لا تهاجم الناجح وتمتدح الضعيف .. لا تنتقد المجتهد الذي يعمل وتربت علي كتف الكسول
 




Hasrean يوميات طبيب امتياز ـ مراسلنا فى المستشفى ـ

اكتب يا تاريخ سجل يا أرشيف
يوميات طبيب امتياز
ـ مراسلنا فى المستشفى ـ

هذا موضوع اتمنى ان يكون يوميا يرويه لنا مراسلنا فى المستشفى وسنحاول جاهدين ان ننقل لكم ما دار مع مراسلنا ولو عرفنا نجيب لكم اخبار اخرى هنجيب واهو يكون حاجة جديدة برده ينفرد بها مراسلنا لمن اراد ان يتابعنا
فى يوم 10 مارس وفى تمام الساعة التاسعة صباحا ـ طبعا اول يوم النشاط والحماسة الطلابية واخدة الجميع وواخدانى معاهم ـ الكل فى المستشفى وكل واحد بيشوف اتوزع فين
المهم مراسلنا طلع تخدير ـ اللى سمعناه ان مفيش غياب ولا حضور ـ بس اذاى نرجع من اول يوم مينفعش لازم نروح .
روحنا اوضة التخدير وتستلم بدلتك من واحد لسة معرفتش اسمه وتشوف ان داخل فين المشكلة ان اوضة العمليات اللى مراسلنا هيدخل فيها كانت زحمة ـ على حسب التوزيعة ـ طبعا الالتزام شعار منقدرش نروح نشوف غيره نروح اوضة تانية

* الحالة الاولى : دولى فى الخصية
نلاقى عيان المفروض متخدر ـ وهتعرفوا ليه قولت المفروض ـ دكتور كبير واقف ـ باشا ذى ما بيسموه ـ والتانى قدامه وهدوء تمام ولسة هيفتحوا بطن العيان العملية بتتعمل من البطن علشان يربط الوريد من فوق
طبعا مراسلنا مسبش الفرصة مهو فيه تربيزة الناس زحمة عليها وتربيزة لسة هتتزحم نقف على الفاضية
وبعيدن الناس جت تباعا
طبعا الناس اللى جاية بتسال مراسلنا الحالة ايه ـ المشكلة ان المراسل مسألش الباشا ـ ولقاه بيفتح بطن واول يوم بقى قولت هيشيل زايدة ـ ومش اقولهم بصوت واطى لا بصوت عالى ـ بس الحمدلله الباشا قالى لاء الحالة كذا وبذوق والله
وبعدين والباشا شغال العيان بيقوله براحة يا دكتور ـ قولت يبقى العيان متخدر نصفى ، رغم اللى اتقال ان الافضل كلى فى الحالات دى ـ تيجى تسال دكتور التخدير ـ ميردش ـ طبعا مش هتسأل الباشا ـ قولت برده مش هنسلم ومش هنمشى واقف واقف ـ بس قال للعيان غمض عنيك واعمل نفسك نايم ومتصدعناش بقى
شوية والباشا حن علينا واتكلم شوية بس والله كان مفيد طبعا ـ منقدرش نقول غير كده ـ
وبعدين بعد ما الباشا خلص لازم تقول كلمتين برده
كل واحد قال كلمتين تشجيع وشكر للباشا ـ بس طبعا مراسلنا الشريف لا يجامل ـ ممكن علشان متردش علينا فى الاول
ولكن الذكاء المصرى الدفين يخلى واحد يقول للباشا انت ليه عملتها كده معملتش العملية التانية ـ يقصد طريقة تانية ـ وعينك متشوف الا النور ـ معلش بقى نكتفى بهذا القدر علشان الرقابة والشغل اسرار يا سيد ـ وبكده تعرف ان لو حالة هدوء اياك انك تتكلم وتضيع الهدوء

* الحالة التانية : التهاب مزمن فى الثدى ـ كانوا بيقولوا كده ـ
وقفنا برده هنروح فين ـ انا حاجز اليوم كله وهلعب دور كمان ـ
والمرة دى قولنا هنعرف تخدير بقى حاضرين الحالة من الاول
دكتورة التخدير جت عايزة تخدر العيانة تحاول تسأل ـ بقاء الوضع على ماهو عليه ـ قولت مش مهم التخدير ـ
وجه باشا ـ بس المرادى على صغير ـ ولقانا واقفين من الاول قال يشرح وبصراحة كان تمام خالص
وبيكلم بثقة ذى الفل قولت فى بالى مش العجلة هتلف وهنفهم ـ قال الحالة كذا ومش هنستنى المعمل يقولنا هى سرطان ولا لاء الحالة واضحة
ابتدى وفتح وبعدين استخدم الدايثرمى وانت تشم احلى ريحة كباب بقى ـ هو بيعمل حرارة وذى الشوى كده ـ المهم الحمدلله شال ذى مهو كان واعدنا وكان رايح يقفل ساب اللى تحتيه يقفل هو فبيقولوا نستنى المعمل ـ قاله معمل ايه قفل قفل ـ انت تشوف حد بيكلم بثقة كده تعرف ان حاجة هتحصل وطبعا مينفعش تعترض لان موقف صحبك لسة فى بالك ـ تسكت احسن انت مشاهد فقط ـ
وفجأة بعد ما قفل يجى واحد تانى باشا تانى طبعا ـ ويقولوا اذاى تقفل الحالة طلع فيها ورم ـ سرطان ـ ولازم تشيل ولا اقولك خليها السبت بدال انت قفلت
وجه الباشا الاول وقال انا كنت حاسس بس كنت متفائل ـ وعجبى ـ
وبكده تعرف يقولولك تقفل تقفل متقفلش متقفلش ـ هو انت دافع حاجة من جيبك ـ

* الحالة التالتة : فتق فى البطن
وهنا جه باشا ـ اصغر ـ كل ما تتأخر الناس بتصغر الكبار يجوا الصبح ياخدوا وش القفص وخلاص
المهم مكنش معاه مساعدين لأنه لسة فى منتخب الشباب هيجيب منين قال يجيب واحد من الناشئين فكان مراسلنا واقف قالوا تتعقم ـ قال وماله هو انا دافع حاجة من جيبنا ـ
قالى اتعقمت قبل كده ، الشافية شعارى : لا ياباشا احنا اول يوم ، قالى مش مهم تعالى ، كان ذوق جدا بصراحة قالى اعمل ايه وكان متعاون جدا ـ قولت العجلة بدات تلف تانى ـ الحمدلله
وبعدين الحكيمة قالتلى اعمل كذا وكذا وكانت متعاونة برده
فتح البطن وانا مطالب منى افهمه رغم انه كان دور جديد عليا بس الحمدلله ربنا يسر الحال وهو كان متعاون ومتفاهم ـ متعرفش بقى هو كده ولا علشان ملقاش غيرى مجبر اخاك لا بطل ـ لا تدرى بس قبل منبتدى كان فى دكتورة اتعقمت ـ بس مراسلنا مش هيسب دور البطولة بقى ـ خصوصا ان كلنا امتياز وهو كان طالبنى ـ شكله كان بيقدر المواهب ـ وطالبنى بالاسم ـ هو مش لاقى غيرى بينى وبينك ـ
شال الفتق وظبط الامور وركبنا الشبكة الحمدلله وكان مطلوب منى اوسعله علشان يشوف فى بطن العيانة شوية بايدك وشوية بآلة لازم تتصرف بقى
والحمدلله لاول مرة ايدى كانت فى بطن عيانة ـ او عيان ـ لولا ستر ربنا عليا كنت سبته ومشيت بس طبعا الحمدلله ومكنش ينفع اسيبه وامشى الراجل وثق فيا وقدر المواهب اسيبه بعد فتح البطن ـ مش انا هذا الرجل ـ
والحمدلله العملية تمت على خير وفى الأخر سابلى غرزة ليا وغرزة للدكتورة التانية ومحدش دفع حاجة
وطبعا هنا لازم اشكره واسلم عليه ـ قدر موهبتى واختارنى وهو مضطر ـ يبقى اشكره من قلبى
وبكده نعرف حد يقولك حاجة تسمع كلامه ومتقولش لاء حتى لو متعرفش
انت فرجت كربته يبقى كربتك هتتفرج ان شاء الله وهو هيعاملك باحسن ما تتوقع
ونشكره مرة تانية على دور البطولة اللى ادهونى


وكفاية كده لانى روحت بعد الحالة التالتة
مش معقول هتفرج طول النهار بقى
وكمان رجلى وجعتنى انا واقف احتياطى حالتين
ونزلت اساسى فى التالتة ومكنتش مدرب كويس

وإلى لقاء فى الحلقة الجاية
وياريت متكنش زهقت من الموضوع
انا كتبته كمذكراتى وعلشان متخضش من اول يوم فى كتير اتخضوا

هى الكتابة بفلوس يعنى
استنانى بكرة إن شاء الله
ولو غيبت شوفنى فى المستشفى
ولا تنسونى من دعائكم
 

التعديل الأخير تم بواسطة هجرة إلى الله السلفية ; 03-15-2009 الساعة 07:32 PM
رد مع اقتباس
  #2  
قديم 03-11-2009, 09:20 AM
أبو مصعب السلفي أبو مصعب السلفي غير متواجد حالياً
الراجي سِتْر وعفو ربه
 




افتراضي

الله المستعان
لا أدري أأقول: أضحك الله سنك على طريقتك
أم أقول: إنا لله وإنا إليه راجعون على حال الأطباء -إلا من رحم ربي-!

على العموم
جزاك الله خيراً يا أستاذي
وشد حيلك عشان لما نيجي نقول -إلا من رحم ربي- تكون مندرج تحتهم

والحمد لله
..
 

التوقيع

قال الشاطبي في "الموافقات":
المقصد الشرعي من وضع الشريعة إخراج المُكَلَّف عن داعية هواه, حتى يكون عبداً لله اختيارًا, كما هو عبد لله اضطراراً .
اللـــه !! .. كلام يعجز اللسان من التعقيب عليه ويُكتفى بنقله وحسب .
===
الذي لا شك فيه: أن محاولة مزاوجة الإسلام بالديموقراطية هى معركة يحارب الغرب من أجلها بلا هوادة، بعد أن تبين له أن النصر على الجهاديين أمر بعيد المنال.
د/ أحمد خضر
===
الطريقان مختلفان بلا شك، إسلام يسمونه بالمعتدل: يرضى عنه الغرب، محوره ديموقراطيته الليبرالية، ويُكتفى فيه بالشعائر التعبدية، والأخلاق الفاضلة،
وإسلام حقيقي: محوره كتاب الله وسنة رسوله صلى الله عليه وسلم، وأساسه شريعة الله عز وجل، وسنامه الجهاد في سبيل الله.
فأي الطريقين تختاره مصر بعد مبارك؟!
د/أحمد خضر

من مقال
رد مع اقتباس
  #3  
قديم 03-11-2009, 11:34 AM
طالب النجاة طالب النجاة غير متواجد حالياً
قـــلم نــابض
 




افتراضي

جزاك الله خيرا ،

أنا بتهيألي أنتم أكتر الناس بتتأكد عندهم شكر نعمة العافية ، لان كل حاجة قدام عينيكم
لكن الذين ينظرون الى الجانب المادي.. قلوبهم قاسية

ما شاء الله مراسل بيجيب حالات كتيير،
 
رد مع اقتباس
  #4  
قديم 03-11-2009, 01:55 PM
د. حازم د. حازم غير متواجد حالياً
قـــلم نــابض
 




افتراضي

الف مبروك ياهندسة على اول غرزة والحمد لله انك لم تجرح أيدك وانت ماسك الابرة والخيط
ياريت تخترع لنا ياهندسة ماكينة خياطة للجروح أو دباسة ندبس بها الواوا
وافتكر بكره يا هندسة لما تكون باشا وتشرح للناشئين تحت 25 سنة انك كنت فى يوم من الايام فى الامتياز
نفسى تسأل الراجل الاول ماذا كان شعوره لما فاق من البنج
 

رد مع اقتباس
  #5  
قديم 03-11-2009, 07:36 PM
الشافعى الصغير الشافعى الصغير غير متواجد حالياً
لا تهاجم الناجح وتمتدح الضعيف .. لا تنتقد المجتهد الذي يعمل وتربت علي كتف الكسول
 




افتراضي

جزاكم الله خيرا جميعا
وشجعتونى للمزيد من الصمود
النهاردة الحلقة شكل تانى ومكان تانى ـ انتظروها ـ

اقتباس:
الف مبروك ياهندسة على اول غرزة والحمد لله انك لم تجرح أيدك وانت ماسك الابرة والخيط

مش بقولك فى الموضوع فوق الباشا كان بيرعى المواهب برده ليه نظره مش واخد اى حد

اقتباس:
ياريت تخترع لنا ياهندسة ماكينة خياطة للجروح أو دباسة ندبس بها الواوا

موجودة بالفعل بس النفس اللى تشتريها
اقتباس:
وافتكر بكره يا هندسة لما تكون باشا وتشرح للناشئين تحت 25 سنة انك كنت فى يوم من الايام فى الامتياز

لست هذا الرجل ـ مش بقولك طول الحلقة شريف وشفافية ـ مش ممكن اكون كده قول حاجة تانية
اقتباس:
نفسى تسأل الراجل الاول ماذا كان شعوره لما فاق من البنج
مش لما يكون اتخدر اصلا علشان يفوق
قابلونى الحلقة الجاية

 
رد مع اقتباس
  #6  
قديم 03-12-2009, 12:16 AM
أم عمر السلفية أم عمر السلفية غير متواجد حالياً
قـــلم نــابض
 




افتراضي

الله المستعان
لا حول ولا قوة إلا بالله
 


التعديل الأخير تم بواسطة أم عمر السلفية ; 03-16-2009 الساعة 01:03 AM
رد مع اقتباس
  #7  
قديم 03-12-2009, 12:56 AM
أبو أنس الأنصاري أبو أنس الأنصاري غير متواجد حالياً
II كَانَ اللهُ لَهُ II
 




افتراضي

في انتظار الخَضّة الثانية .
والحمدُ للهِ على نعمةِ العافية .
 

رد مع اقتباس
  #8  
قديم 03-12-2009, 01:53 PM
الشافعى الصغير الشافعى الصغير غير متواجد حالياً
لا تهاجم الناجح وتمتدح الضعيف .. لا تنتقد المجتهد الذي يعمل وتربت علي كتف الكسول
 




افتراضي

اكتب يا تاريخ سجل يا أرشيف
يوميات طبيب امتياز
ـ مراسلنا فى المستشفى ـ

فى يوم 11 مارس وفى تمام الساعة التاسعة صباحا ـ لسة الحماسة موجودة وأحلام اليوم الأول بتراودنى والنشاط والحماسة الطلابية واخدة الجميع وواخدانى معاهم ـ خلاص بقى عرفت مكانى ورايح وكلى أمل ألاقى الراجل اللى لسة محفظتش اسمه بيقول مفيش بدلة ـ يقصد بدلة التخدير ـ قولت أدى اول صدمة بس برده مش هنسلم ونرجع الالتزام شعارى نتكلم مع الراجل مصر على موقفه مفيش بدل الدكاترة كلهم جم وكل واحد وشلته ،عدى علينا بكرة وتعالى بدرى ،قولت خلاص مش هنموت
بس مش هنروح برده ـ الحماسة تخلينى اقترح على الناس نروح مكان تانى ـ كله بلاش بقى
نروح مركز نضيف جدا بصراحة وهو مركز الاورام تدخل نضافة فائقة وتكيفات ونظام قولت الدنيا هتضحكلى بقى دخلنا جبنا البدل من عندهم والناس متعاونة جدا وبترحب بينا ـ قولت العجلة هتلف دخلنا اول اوضة مفيش زحمة ولا حاجة بقى نسأل العملية ايه الناس بتجاوب التخدير بيجاوبوا ـ قولت احنا فين اكيد فى حاجة غلط دول بيجاوبوا ـ

ونبدى مع الحالة الاولى سرطان فى المثانة
والعيان كان كبير نسأل الله أن يشفيه وجميع مرضى المسلمين اتفرجنا وعايز تسأل تسأل والدكاترة واخدين راحتهم خالص وقفنا حوالى ساعتين والدكتور ـ والمرة دى مش باشا ـ بيقلولوا يا دكتور والكبير كبير برده
الدكتور عايز يسلك الورم الورم منتشر ،يقطع ويشوف برده مفيش امل ،والحالة متأخرة والدكتور اعلن ان العيان مش هيستفيد من العملية وحالته هتسوء أكتر
فكان قدامه اختيار يقفل تانى ولا يشيل والعيان يسوء
ساب العيان 10 دقايق يفكر وطلع برة ورجع قال المفروض فى الكتب اننا ممكن نشيل والعيان وحظه ولكن انا لو شلت وغامرت الحالة هتسوء العيان حالته سيئة جدا ومنتشر فى الجهاز الهضمى ومش هيستفيد وكده ممكن نشيل الليلة كلها نقفل احسن
بصراحة عجبنى قراره ـ رغم انى مش فاهم ـ ولكن قال مش هعمل نفسى بطل ونشيل والعيان يموت على التربيزة ومخفش على شكله ولا حاجة ـ قال نقفل والعيان يمشى على علاج اشعاعى افضل ـ وبالفعل الدكتور قفل ونسأل الله ان يشفى مرضى المسلمين
والحالة خلصت بعد ساعتين ونص تقريبا بس طبعا كان كل شوية جرس انذار للحكيمة عدى الفوط خلى بالك من الفوط ـ انتم عارفين بقى برامج التوك شو مش هتسبنا لو نسينا الفوطة وكأنهم فاكرين انها ملاية ميعرفهوش انها ذى الشاشة
وبكده نتعلم ان مصلحة العيان اولا برده متعملش بطل والعيان يموت منك
يافرحتى شيلت الورم والعيان مات

الحالة التانية : أخد عينة من الغدة اللفاوية من تحت الأبط
دكتور جه يعملها بس كان صغير شوية اداله البنج الموضعى وفتح ،ووهو شغال العيان بيتالم ادى بنج تانى و5 دقايق والعيان بيتالم ويصوت تانى
متعرفش بقى العيب فى العيان هو اللى فايق اوى ولا العيب فى البنج هو اللى مضروب واكيد طبعا العيب مش فى الدكتور
بس اللى ضايقنى بصراحة الدكتور كان بيكمل والعيان بتتالم جدا والناس تقوله اديله بنج يقوم مدى بعديها هو مكنش سامع ،العيان كان شوية وهيقوم من اللى شافه
انا عن نفسى قارنت بين الحالة الاولى والحالة التانية قولت لازم لو مش بتعرف متعملش بطل ومحدش مولود متعلم نتكلم واحدة واحدة هى مش بالدراع
وكفاية كده لانى روحت بعد الحالة التانية
مش معقول هتفرج طول النهار بقى
وكمان رجلى وجعتنى انا واقف احتياطى الحالتين
ونويت اشوف حل لرجلى ان شاء الله
وإلى لقاء فى الحلقة الجاية
وياريت متكنش زهقت من الموضوع


هى الكتابة بفلوس يعنى
استنانى بكرة إن شاء الله
ولو غيبت شوفنى فى المستشفى
ولا تنسونى من دعائكم
استنونى الحلقة الجاية
 

التعديل الأخير تم بواسطة هجرة إلى الله السلفية ; 03-15-2009 الساعة 07:41 PM
رد مع اقتباس
  #9  
قديم 03-12-2009, 06:37 PM
أم عبد الرحمن السلفية أم عبد الرحمن السلفية غير متواجد حالياً
قـــلم نــابض
 




افتراضي


ما شاء الله .. تبارك الله .
حلقات ماتعة .
ونسأل الله أن يعافي جميع مرضى المسلمين .
جزاكم الله خيراً, ووفقكم الباري لما يحب ويرضى .
 
رد مع اقتباس
  #10  
قديم 03-13-2009, 12:29 PM
الشافعى الصغير الشافعى الصغير غير متواجد حالياً
لا تهاجم الناجح وتمتدح الضعيف .. لا تنتقد المجتهد الذي يعمل وتربت علي كتف الكسول
 




افتراضي

اكتب يا تاريخ سجل يا أرشيف
يوميات طبيب امتياز
ـ مراسلنا فى المستشفى ـ

فى يوم 12 مارس وفى تمام الساعة الثامنة والنص صباحا ـ المرة دى نازل بدرى بقى عايز احجز البدلة قبل ميخلصوا وكلى أمل وتفائل كعادتى لقيت الراجل اللى لسة مش عارف اسمه بيقولى بالسلامة بح ـ مفيش عمليات النهاردة رغم هو اللى قايللى تعالى بكرة بدرى الساعة 8 ونص ، النهاردة أجازة قولت فى بالى والله انا مكنتش عايز انزل بس هى الحماسة اللى عملت فيا كده قولت للى معايا احنا نروح وخلاص ناخده اجازة وادى جزاء سماع الكلام
لولا الأصحاب بقى ـ يقنعوك تروح مكان تانى واحنا نزلنا وحاجات من دى ـ والضمير يتكلم ساعتها قولت خلاص يلا
نروح مكان تانى نلاقيه بالسلامة بح برده ـ شكل الخميس اجازة مش رسمية ولا العيانين جم ولا الدكاترة جم ـ العيانين عندهم خبرة بقى ـ قولت يبقى كده ملناش نصيب النهاردة وبكده نعرف انك لو مش عايز تنزل متنزلش ونصيبك مش هيخده غيرك واجرى يا ابن ادم جرى الوحوش غير رزقك لم تحوش ـ وخد دى من عندى بقى ـ وياتشوف العيان يا متشفهوش
وكفاية كده لانى روحت بيتى أولى بيا
مش معقول هلف على كل الاقسام بقى
وكمان رجلى لسة بتوجعنى
وناوى اشوف حل لرجلى ان شاء الله
وإلى لقاء فى الحلقة الجاية
وياريت متكنش زهقت من الموضوع

هى الكتابة بفلوس يعنى
انا هريحك بكرة ، بكرة اجازة إن شاء الله
ولو غيبت شوفنى فى المستشفى
ولا تنسونى من دعائكم
استنونى الحلقة الجاية
ويارب العجلة تلف
 

التعديل الأخير تم بواسطة هجرة إلى الله السلفية ; 03-15-2009 الساعة 07:44 PM
رد مع اقتباس
إضافة رد


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


منتديات الحور العين

↑ Grab this Headline Animator


الساعة الآن 04:28 AM.


Powered by vBulletin® Version 3.8.4
Copyright ©2000 - 2024, Jelsoft Enterprises Ltd.
.:: جميع الحقوق محفوظة لـ منتدى الحور العين ::.