دخل الأب وعلى شفتيه ارتسمت إبتسامة لا تناسب الموقف بالمرة!

الأب:السلام عليكم

محمد:وعليكم السلام ورحمة الله



الأب(وهو يجلس):مالك يا محمد؟!

محمد:أبداً يا بابا00000مافيش!

الأب:إمال لو كان فيه كنت عملت إيه؟!

لم يرد محمد وإنما ظل ينظر للأرض في حيرة وترقب بينما بدأ الأب فتح الموضوع

الأب:ماما قالتلك على رغبتي؟!

ظهرت علامات الضيق مجدداً على محمد وهو يقول

محمد:أيوة!

الأب: ودة الي مزعَّلك؟

محمد:يا بابا مع إحترامي لرغبتك لكن0000

الأب(بهدوء عجيب):لكن إيه؟

محمد:لكن أنا مش فاهم ليه كلية الشرطة بالذات!

الأب: وإيه كمان؟

تعجب محمد من هدوء أبيه غير المتوقع ولكنه أكمل

محمد: وكمان يا بابا كل ما أسألك تقولي هات مجموع كبير بس الأول وبعدين نتكلم000والحمد لله ربنا أكرمني وجبت مجموع حلو0000000لكن كلية الشرطة مالهاش علاقة بأي مجموع لأنها ممكن تاخد من 50 أو 60%!!!

الأب:ماهو لما تدخلها وإنت جايب مجموع كبير محدش هيقدر يقول دة مجموعه ضعيف عشان كدة دخل شرطة!

محمد:طب ليه الشرطة يا بابا؟!

أتت نهى على صوت المناقشة فجلست في هدوء تستمع وأبيها يقول

الأب(وهو ينظر لنهى):عشان تحمينا يابني!

محمد(بدهشة):أحميكم؟! أحمي مين؟! ومن مين؟!

الأب:تحميني أنا وأمك وأخواتك وتحمي أهلك000وكمان تحمي نفسك!

محمد(مايزال مندهشاً):أحميكم من إيه يا بابا؟!

الأب:من الي حصل لجدك الله يرحمه!

لم ينطق محمد بكلمة بينما أكمل الأب

جدك الله يرحمه كان متأثر بالتدين وقراءة الكتب الدينية ومتابعة السياسة وبعد ما اتجوز كان أخو زوجته من الإخوان وتأثر بيه وبآراءه وبأفكاره فانضم للإخوان !

صمت الأب فترة قصيرة تبادل خلالها نهى ومحمد نظرات الحيرة والتقرب قبل أن يكمل

الأب:ولما جدك بقى إخواني انقلبت حياته كلها رأساً على عقب!

البيت كله حاله اتشقلب وماتعديش سنة إلا لما ييجي الأمن للبيت مرة أو مرتين يقتشوه ويقلبوه ويبهدلوا كل الي فيه وبعدين ياخدوا جدكم للمعتقل

مرة شهر ويخرج ومرة 3 شهور ومرة يكمل السنتين!

ورغم كل دة جدكم الله يرحمه كان مؤمن جداً بالإخوان وبأفكارهم فكل ما كان يخرج من السجن كان يرجعله تاني بسبب لقاءاته أو حتى أفكاره!

وظل الوضع كدة سنوات طوال لغاية آخر مرة اتسجن فيها قعد 4 سنين!

وبدأت بعض الدموع الخفيفة تظهر في عيني الأب دون أن تنزل منهما وهو يكمل وسط إهتمام محمد ونهى وراندا التي إنضمت إليهم

الأب:كانت أسوأ 4 سنين إتسجنهم0000لأنه إتعذِّب عذاب شديد لإصراره على معارضة النظام والتحدث في السياسة والدين وكانوا الضباط زهقوا منه وقرروا إنهم يخرجوه بعاهة مستديمة!

ودة كان في الستينيات أيام عبد الناصر الي كان بيكره الإخوان كره العمى!!

وفعلاً 000000خرج جدّكم من السجن أعمى!

وضعت راندا يديها على عينيها بحركة تلقائية بينما قالت نهى

نهى:ياالله!!!00000أعمى؟!

محمد:معقولة يا بابا؟!

أومأ الأب برأسه في حزن شديد وهو يكمل

الأب:أيوة 000000جدكم خرج من المعتقل أعمى ورغم كدة أصر إنه يتم زفاف أبي على أمي لأن كتابهم كان مكتوب من قبل دخوله الأخير للمعتقل ولكن إعتقاله حال دون فرحة أبي 0000فأصر جدي على الدخول ودة حصل بعد ما خرج جدي تقريباً ب10 أو 11 شهر وبعد ما تم الدخول بأقل من شهر

مات جدي!!

ظهر التأثر الشديد على الجميع والأب يكمل

الأب:وبعد ما مات بيوم واحد جه الأمن أخذ أبي وهو لسة عريس جديد ولسة ما فاقشي من صدمة وفاة أبيه أخدوه إسبوع واحد ولم يتركوه إلا وقد أكد لهم أنه لا علاقة له بالإخوان أو حتى بالدين من أساسه!

ولولا عمل كدة ماكانوش سابوه هو كمان!000وخصوصاً إن أخته إلي هي عمتي كانت متأثرة بجدي وكانوا بالفعل ممكن يؤذوها هي كمان لولا إنها تزوجت من ضابط شرطة!

والضابط دة حماها كتير منهم ومش بس كدة وإنما كان له دور في إبعاد عيونهم عن والدي وعن بقية أهلي وأقنعهم إنه ما حدش متأثر بالجد!

أنا يا محمد بحكيلك الكلام دة لسبب0000000لأني كنت زيك كدة في يوم من الأيام

لما وصلت لسن 20 سنة بدأت أتلم على شلة ملتحين وأروح المساجد وأحضر خطب زي ما محمود بيعمل دلوقتي
لكن مجرد حضور بس مش أكتر 0000فلقيت والدي غضب غضب شديد وأنا كنت مندهش وعِندي وكنت مُصر على موقفي وعِنادي 00فاضطر إنه يقولي على حكاية جدي وحكايتهم من بعده عشان ما نتبهدلشي البهدلة إلي إتبهدلوها!

عرفت بقى ليه بقولك ما تبقاش زي محمود؟!
عرفت ليه عمتك خايفة على محمود؟!

عرفت ليه أنا عاوزك تخش كلية الشرطة؟!


يتبع000000000