[الشافعى الصغير]

 

الكيميا فيها عفريت

كتب على سلامة
هو الخوخ ماسخ ليه كده السنة دى..
قال يعنى السنة اللى فاتت
كان معسل..
ياااه..
تصدق..
نفسى أقول آه
بس بصراحة مكسل..
علمونا فى المدرسة
إن حصة الدين زى قلتها
مفيهاش نجاح وسقوط..
وكده.. كده
رايحين النار لما نموت
وعلمونا فى البيوت
إن الأدب يعنى السكوت
والمشى جنب الحيط
ويا داخل بين البصلة وقشرتها
من ساعتها
واحنا بنتفرج من بعيد
ونحلم من بعيد
ونحب من بعيد
ونستنى نشوف أخرتها..
وعلمونا ف الحكومة
إن فاتك الميرى
سف التراب..
وقالولنا إن الكيميا فيها عفريت
كلنا حوّلنا آداب..
حفظنا الأناشيد
وسقطنا فى الحساب..
على فكرة الحر السنة دى
فظيع.. فظيع
قال يعنى السنة اللى فاتت
كان طراوة..
ساكت ليه يا عنب
ما تقولى راحت فين الحلاوة..
واللّه ويحقلك يا قطن تحزن
ويجوزلك تبكى يا بلح
وإزاى نغنى للفرح
وانت يا خوخ
كل سنة بتمسخ..
ما تقولى ليه
كل ما بنضف شارع
يرجع تانى يتوسخ..