[الشافعى الصغير]

 

عزاء واجب

كتب هيثم دبور

خلق وبشر
أهلى اللى ماليين بر مصر
فى العبّارات
متسطحين جنب الشنط
فى قطر خمسة وربع
المتجه يم الصعيد
أهلى اللى منهم شاب صاحى من ساعات
وراسه تقلت ع الإزاز
فى الميكروباظ
كنبه قالوله إنها تشيل أربعة
فضم رُكبه م الزحام
وفجأة نام
أهلى اللى ماشيين ع الرجول
أهلى اللى ركبوا طيارات
أهلى اللى واقفين فى إشارات
مستنيين يخرج وزير
وينطلق موكب وراه
أهلى اللى مشيوا اتجاه
ومشيوا عكس الاتجاه
أهلى اللى رايح واللى جاى
الفاتحة مرة للى مات
وألف مرة للى حى